मुंबई : अंबरनाथ एमआयडीसीमधून नाशिककडे अजस्त्र बॉयलर वाहून नेणारा पुलर उलटल्याची घटना घडली आहे. ही घटना कल्याणमधील पत्रीपुल परिसरात रविवारी पहाटे पाच वाजता घडली असून त्यामुळे परिसरात प्रचंड वाहतूक कोंडी निर्माण झाली आहे.
अंबरनाथ येथून ओडिसाला जाणाऱ्या बॉयलरचा पुलर कल्याण पश्चिमेकडून दुर्गाडीकडे जात असताना पत्रीपुल परिसरात उलटला आहे. सुदैवाने पहाटेची वेळ असल्याने रस्त्यावर फारशी वर्दळ नव्हती. त्यामुळे कोणतीही दुर्घटना झाली नाही. या अपघातानंतर कल्याणकडे येणाऱ्या वाहतुकीवर मोठा परिणाम झाल्याचे पाहायला मिळाले आहे.
तसेच क्रेनच्या साहाय्याने हा उलटलेला पुलर बाजूला करण्याचे प्रयत्न वाहतूक पोलिसांकडून सुरू होते. त्यामुळे सकाळी साडे आठच्या सुमारास पुलर बाजूला करण्यात त्यांना यश आले आहे. मात्र चार तास वाहतूक खोळंबली होती. अथक प्रयत्नानंतर पोलिसांनी उलटलेला पुलर आणि अजस्त्र बॉयलर बाजूला काढल्यामुळे आता वाहतूक पूर्वपदावर आली आहे.
