या वयात तरी खोटे बोलू नका म्हणत उपमुख्यमंत्री देवेंद्र फडणवीस यांनी शरद पवार यांचा खोटेपणा उघड केला आहे,ज्यांच्या काळात कधी गुजरात तर कधी कर्नाटक क्रमांक एकवर होते ते आज महाराष्ट्र एक क्रमांकावर असतांना अधिकच अस्वस्थ झालेत अशी सणसणीत चपराक देखील देवेंद्र फडणवीस यांनी एक्स वर दिली आहे.
“या वयात इतके खोटे बोलायचे नसते. काल जयराम रमेशजी आणि आज शरद पवारजी, ज्यांच्या काळात गुंतवणूक आणण्यात कधी गुजरात तर कधी कर्नाटक नंबर एकवर होते, ते आज महाराष्ट्र क्रमांक एकवर आल्यावर जरा अधिकच अस्वस्थ झालेत. तरी सुद्धा खोटा नरेटिव्ह सेट होण्यापूर्वी वास्तव महाराष्ट्राला पुन्हा एकदा सांगावे लागेल,” असं म्हणत फडणवीस यांनी टाटा एअरबस, फॉक्सकॉन या प्रकल्पाची उदाहरणं दिली आहेत.
“टाटा एअरबस, फॉक्सकॉन असो किंवा अन्य प्रकल्प सातत्याने खोटे बोलून मविआच्या नेत्यांनी दिशाभूल केली. सॅफ्रॅनच्या बाबतीत तर कहरच केला होता. कंपनीने २ मार्च २०२१ लाच हैदराबादेत त्यांच्या प्रकल्पाचे उदघाटन केले होते. पण, आमचे सरकार आल्यावर तोही प्रकल्प गुजरातला गेल्याची आरोळी उठवली गेली. ३१ ऑक्टोबर २०२२ रोजी या सर्वांबाबत मी स्वत: मंत्रालयात एक पत्रपरिषद घेतली होती. सर्व मुद्यांचे सविस्तर सादरीकरण केले होते. पण, पुन्हा पुन्हा खोटे बोलून तोच तो अजेंडा सांगितला जात आहे. स्वत:जवळ काही सांगण्यासारखे नसले तर खोट्याशिवाय कशाचाच सहारा नसतो, हेच सत्य आहे. असू द्या. एकीकडे ५२ टक्के परकीय गुंतवणूक राज्यात आणणारे सरकार आहे आणि दुसरीकडे गुजरातच्या ब्रँड अॅम्बॅसिडरच्या भूमिकेतील कर्तव्यशून्य महाविकास आघाडी. राज्यातील जनताच याचा निकाल २० नोव्हेंबरला लावेल,” असेही देवेंद्र फडणवीस म्हणाले.
