बीड (प्रतिनीधी) दि.12 जानेवारी 2025 रोजी महाराष्ट्र केसरीसाठी बीड जिल्ह्यातील निवड चाचणीचे आयोजन बीड शहरातील मल्टीपर्पज ग्राउंड येथे करण्यात आले आहे. या स्पर्धेत मॅट व मातीवरील कुस्त्यांचे आयोजन करण्यात आले असून जिल्हाभरातून जवळपास 1,000 ते 1,500 कुस्तीपटू सहभागी होणार आहेत.ही चाचणी सकाळी छत्रपती शिवाजी महाराजांच्या पुतळ्यास पुष्पहार अर्पण व बजरंग बलीला नारळ फोडून शुभारंभ करण्यात येणार आहे. कुस्तीपटूंच्या नियोजनाची चोख व्यवस्था करण्यात आली असून स्पर्धेचे नियोजन बीड जिल्हा कुस्तीगीर संघाने केले आहे अशी माहिती आयोजक पै.जब्बार शेख यांनी दिली आहे.
बीड जिल्हा कुस्तीगीर संघाचे अध्यक्ष माजी आमदार भीमराव धोंडे, उपाध्यक्ष संभाजी मिसाळ, सचिव सय्यद चाऊस हे या कार्यक्रमासाठी प्रमुख उपस्थिती असणार आहे. याशिवाय हरिभाऊ महादेव, अभिजीत तांदळे, शेख शफीक भाऊ, उज्वल गायकवाड, नरेश पिवळ हे उपस्थित राहणार आहेत. आयोजक जब्बार शेख, किरण मिसाळ व नियोजक डॉ. शिवाजी मिसाळ यांनी या स्पर्धेची तयारी केली आहे.या निवड चाचणीला कुस्तीप्रेमी आणि जिल्ह्यातील नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.या निवड चाचणीतील कुस्तीपटूंच्या कामगिरीवरून महाराष्ट्र केसरीसाठी पात्र ठरणाऱ्या खेळाडूंची निवड करण्यात येणार आहे.
