मोठी घडामोड!योगेश क्षीरसागर यांचा राजीनामा!

बीड – राष्ट्रवादी काँग्रेस अजित पवार गटाचे बीड विधानसभा अध्यक्ष डॉक्टर योगेश क्षीरसागर यांनी आपल्या पदाचा तडकाफडकी राजीनामा देत पक्षाला जोरदार धक्का दिला आहे. स्थानिक पातळीवरील निर्णय प्रक्रियेत आपल्याला वारंवार डावले जात असल्यामुळे आपण राजीनामा देत असल्याचे डॉक्टर क्षीरसागर यांनी म्हटले आहे.

एकीकडे स्थानिक स्वराज्य संस्था निवडणुकीची लगबग सुरू असताना बीडमध्ये अजित पवार गटाला मोठा धक्का बसला आहे. 2024 ची विधानसभा अजित पवार गटाकडून लढवलेले डॉक्टर योगेश क्षीरसागर हे पराभवानंतरही अजित पवार गटात सक्रिय होते.

नगरपालिकेच्या निवडणुका जाहीर झाल्यानंतर डॉक्टर योगेश क्षीरसागर यांच्याकडे बीड विधानसभा मधील स्थानिक स्वराज्य संस्थांची सर्व सूत्रे येतील अशी अपेक्षा त्यांना होती मात्र बीड मधील अजित पवार गटात असलेली गटबाजी दिसल्यानंतर डॉक्टर क्षीरसागर यांनी याबाबत पक्षश्रेष्ठींच्या कानावर अनेक वेळा ही गोष्ट घालण्याचा प्रयत्न केला मात्र त्याकडे सोयीस्करपणे दुर्लक्ष करण्यात आले.

बीड नगरपालिकेच्या उमेदवारी निश्चिती बाबतची सर्व सूत्रे माजी आमदार अमरसिंह पंडित यांच्याकडे दिल्यानंतर नाराज झालेल्या डॉक्टर योगेश क्षीरसागर यांनी आपल्या बीड विधानसभा अध्यक्ष पदाचा राजीनामा पक्षश्रेष्ठींकडे पाठवला आहे.

नगरपालिका निवडणुकीत डॉक्टर योगेश क्षीरसागर यांनी अजित पवारांचे साथ सोडल्याने आता ते भारतीय जनता पक्षाच्या नेत्या पंकजा मुंडे यांच्यासोबत बीड विकास आघाडी करून लढणार की स्वतंत्रपणे आपली ताकद दाखवणार याकडे सर्वांचे लक्ष लागले आहे.

राजीनामा पत्रात काय म्हंटलं आहे…

मी राष्ट्रवादी काँग्रेस पार्टी (अजित पवार गट) या पक्षाच्या बीड विधानसभा अध्यक्षपदी काम करत होतो. परंतु वेळोवेळी स्थानिक पातळीवर पक्षाच्या निर्णय प्रक्रियेमध्ये मला जाणिवपूर्वक डावलले जात असल्यामुळे मी पक्षातील वरिष्ठ नेत्यांच्या कानावर ही बाब अनेक वेळा घातलेली आहे. परंतु यामध्ये कोणताही बदल झालेला दिसत नाही. त्यामुळे मी माझ्या बीड विधानसभा अध्यक्ष पदाचा व पक्षाच्या प्राथमिक सदस्यत्वाचा राजीनामा आपल्या कडे सुपूर्द करत आहे.

तरी पक्षाने माझ्यावर टाकलेली जबाबदारीच्या माध्यमातून मी पक्षाची विचारधारा तळागाळातील कार्यकर्त्यांपर्यंत निष्ठेने व प्रामाणिकपणे पोहोचवण्याचा प्रयत्न केला. पक्षाने टाकलेल्या विश्वासाबद्दल मी सर्व वरिष्ठ नेतेमंडळींचे मनःपूर्वक आभार मानतो.
आपण केलेल्या सहकार्याबद्दल धन्यवाद…!