बीड (प्रतिनिधी) दोन कोटींच्या खंडणी प्रकरणातील आरोपी वाल्मिक कराड यास मध्यरात्री बीड जिल्हा रुग्णालयात दाखल करण्यात आलं आहे. त्याची प्रकृती अचानक बिघडल्याने त्याला रुग्णालयात दाखल केल्याची माहिती आहे.मध्यरात्री अचानक वाल्मिक कराडला पोट दुखीचा त्रास सुरू झाला. यानंतर पोलीस बंदोबस्तात त्याला बीड जिल्हा रुग्णालयात दाखल करण्यात आले.
कराडवर सध्या बीड जिल्हा रुग्णालयात उपचार सुरू आहेत. वैद्यकीय टीम त्याच्यावर लक्ष ठेवून आहे. बुधवारी बीड जिल्हा मोक्का विशेष न्यायालयाने वाल्मीक कराड याला १४ दिवसांची न्यायालयीन कोठडी सुनावली होती. त्यानंतर त्याची रवानगी बीड जिल्हा कारागृहात करण्यात आली होती. मात्र अचानक रात्री त्याला पोटदुखीचा त्रास होऊ लागला. यानंतर त्याला जिल्हा रुग्णालयात उपचारासाठी दाखल करावं लागलं .
वाल्मीक कराडला स्लीप एपनिया नावाचा आजार आहे. शिवाय काल वैद्यकीय तपासणी पथकाने तपासणी केली असता, वाल्मीकला सर्दी, ताप आणि खोकला असल्याचे आढळून आलं होतं. त्यामुळं कारागृह प्रशासनाने खबरदारीची उपाययोजना म्हणून जिल्हा रुग्णालयात उपचारासाठी दाखल केले आहे. इथे वाल्मीकवर आयसीयूमध्ये उपचार सुरू आहेत.
वाल्मिक बीडचा सरपंच संतोष देशमुख खंडणी प्रकणातील आरोपी आहे. त्याला १४ दिवसांची न्यायालयीन कोठडी सुनावली आहे. खंडणी आणि मकोका अंतर्गत गुन्हा आहे. त्यामुळे त्याला १८० दिवस जामीन मिळणार नाही. वाल्मिक कराड, सुदर्शन घुले आणि प्रतिक घुले यांनी आवादा कंपनीकडे खंडणी मागितली होती. त्याचे सीसीटीव्ही फुटेजही समोर आलं होतं. २९नोव्हेंबर रोजी विष्णू चाटे कार्यालयामध्ये वाल्मिक कराड आला होता. त्याच्यासोबत सुदर्शन घुले आणि प्रतिक घुले देखील असल्याचं दिसत होतं.
३१ डिसेंबर रोजी वाल्मिकने स्वत: शरणागती पत्करली आणि सीआयडी कार्यालयात गेला. त्यांनंतर बीडमध्ये कराड समर्थकांनी आंदोलन, मार्चा काढला होता. आता संतोष देशमुख हत्याप्रकरणातही वाल्मिक कराडला न्यायालयीन कोठडी सुनावण्यात आली आहे. संतोष देशमुख हत्या प्रकरणात वाल्मिक पूर्ण दोषी असल्याचं सिद्ध झालं नाही. मात्र त्यावर आरोप आहेत, या प्रकरणी न्यायलयात सुनावणी सुरू आहे.
